بكت ابنته .. فأسكتها وبكى

السلام عليكم ورحمة الله وبركاته ..

هذه قصة واقعية حكاها لي أحد الاخوان ..

يقول ..

كنا في اليوم السادس عشر من رمضان فأخبرتني زوجتي بأنه لا يوجد طعام في المنزل ..

فقلت لها : والله ما أملكـ إلا ريال واحد لقيته بدرج السيارة .. عندنا تمر وقهوة نفطر عليها ..؟!!

فقالت : التمر موجود ولكن القهوة مخلصة ..

قلت : مهيب مشكلة نفطر على تمر وماء .. وبعد الصلاة نروح لبيت الوالد ..

وبعد الصلاة رحنا لبيت الوالد وكملنا الفطور عنده ..

وحنا راجعين قلت لزوجتي : المشكلة هالحين بالسحور ..

قالت : أخذت من أمكـ طحين بر وسمن وان شاء الله بيكفينا .. بس نبي حليب ..

قلت : حليب السعودية بريال ونص وأنا ما معي الا ريال ..

قالت : فيه أنواع ثانية بريال .. هات أي نوع ..

يوم وقفت عند البقالة قالت بنتي : أبغى فشار بالجبن ..

قالت أمها : بس يا بنت .. الحليب أهم وابوكـ ما عنده فلوس ..

وقامت البنت تبكي وانا نزلت وسكرت الباب علشان ما تفضحنا ..

ودخلت للبقالة وانا محتار مدري آخذ حليب والا فشار ..

التفت للسيارة بشوف هي البنت سكتت والا لا .. لقيتها ملصقة وجهها بالباب وتبكي ..

قلت للعامل : عطني فشار بالجبن ..

ورجعت للسيارة والبنت مبسوطة وامها زعلانه ..

ويوم وقفنا عند الاشارة والحرمة تفتح الفشار إلا يوم سمعتها تصرخ .. قلت الحرمة انهبلت ..

والتفت بشوف وش السالفة ..

قالت الحرمة : لقيت ريال هدية بوسط الفشار ..

فبدأت دموعي بالانهمار كدموع الطفل ..

سبحان الله ..

وعلى نياتكم ترزقون ..